ХЭРГИЙН ТАНИЛЦУУЛГА: “Х-” ХХК нь “М-” ХХК-тай байгуулсан зээлийн гэрээний үүргээ биелүүлээгүй үндэслэлээр 4 195 307 902 төгрөг гаргуулах, барьцаа хөрөнгөөр үүргийн гүйцэтгэлийг хангуулах тухай нэхэмжлэл гаргасан. АНХАН ШАТ: Хариуцагч “М-” ХХК-иас 4 195 307 902 төгрөгийг гаргуулж нэхэмжлэгч “Х-” ХХК-д олгож, барьцаалсан үл хөдлөх хөрөнгөөр үүргийн гүйцэтгэлийг хангуулах шийдвэр гаргасан. ДАВЖ ЗААЛДАХ ШАТ: Хариуцагчийн давж заалдах гомдлыг үндэслэн, анхан шатны шүүхийн шийдвэрийг өөрчлөн, хариуцагчаас 3 993 125 636 төгрөгийг гаргуулж нэхэмжлэгч “Х-” ХХК-д олгож, нэхэмжлэлийн шаардлагаас 202 182 266 төгрөгийг хэрэгсэхгүй болгосон.
ҮНДЭСЛЭЛ: Зээлдэгч нь Хөгжлийн банкны эх үүсвэрээс зээл авсан тул гэрээнд заасан жилийн 9 хувийн хүүгийн хязгаарыг давсан 20.4 хувийн хүү тооцсон нь буруу. Гэрээ цуцлагдсан хугацаанаас хойших нэмэгдүүлсэн хүүг тооцох боломжгүй. Барьцааны гэрээгээр тогтоосон хөрөнгийн үнэлгээ нь үүргийн гүйцэтгэлд хүрэлцэнэ.