Тогтоол №52950

ХЭРГИЙН ТАНИЛЦУУЛГА: Ахлах мөрдөн байцаагч Г.Г нь шалгаж байсан хэрэгтээ хахууль авсан хэргээр яллагдсан. Мөрдөн байцаалтын явцад хэрэг хурдан шийдвэрлүүлэх зорилгоор хахууль өгөгчдөөс 500,000 төгрөг, 2,000,000 төгрөгийг дамжуулан авсан гэж яллах дүгнэлт үйлдсэн. Г.Г нь хахууль аваагүй, өөрийн болон бусдын ашиг сонирхлын үүднээс харьцаагүй гэж мэдүүлсэн. АНХАН ШАТ: Шүүгдэгч Г.Г-ийн холбогдсон гэмт хэрэг нь хангалттай нотлогдоогүй, хэрэгт авагдсан нотлох баримтуудаар гэм буруутай эсэхэд эргэлзээ төрж байгаа тул Эрүүгийн хэрэг хянан шийдвэрлэх тухай хуулийн 1.15 дугаар зүйлийн 2-т заасны дагуу "гэмт хэргийн шинжгүй" гэм буруугүйд тооцож хэргийг хэрэгсэхгүй болгосон.

ҮНДЭСЛЭЛ: Шүүгдэгч Г.Г-д холбогдох хэрэгт хэргийн үйл баримтын цаг хугацаа, хахууль авсан байдал зэрэгт улсын яллагчийн тодорхойлсон дүгнэлттэй зөрүүтэй, эргэлзээтэй байдал тогтоогдсон. Гар утсанд хийсэн үзлэгийн дүнгээр яллах дүгнэлт үйлдсэн нь хахууль шаардсан, авсан үйлдлийг шууд нотлох баримт болж чадаагүй. Г.Г-д хахууль өгсөн гэх гэрч, яллагдагчийн мэдүүлгүүд нь бусад нотлох баримтаар хангалттай нотлогдож тогтоогдоогүй. Г.Г-ийн шалгаж байсан хэргийн хохирогчтой нэгдмэл сонирхолтой этгээдүүд хахууль өгөх болсон, хахууль авсан гэх үйл баримт, түүний хариуд Г.Г-ээс ямар үйлдэл хийсэн нь мөрдөн байцаалтаар сайтар тогтоогдоогүй. Удирдлагын академийн сургалтын төлбөрийг хахуульд авсан мөнгөөр төлсөн гэх нь үндэслэлгүй байна. Эрүүгийн хуулийн 2002 оны 268.1, 268.2 дугаар зүйлүүд нь 2015 оны Эрүүгийн хуулийн 22.4 дүгээр зүйлийн 2-оос хүнд байх боловч прокуророос 2015 оны хуулийг хэрэглэсэн нь шүүгдэгчид ашигтай хууль хэрэглэгдсэн гэж үзсэн.