Захиргааны хэргийн давж заалдах шатны шүүхийн Магадлал

Үйл явдал

Зөрчлийн тухай хуулийн "худалдах, борлуулах" гэх нэр томьёоны тайлбар болон хууль хэрэглээний асуудлаар маргаан үүсэв. Татварын албаны байцаагч дэлгүүрийн лангуу дээр онцгой албан татварын тэмдэггүй согтууруулах ундаа ил өрж тавьсан байсныг нь тогтоож, шийтгэлийн хуудас гаргасан байна. Компани нь тухайн барааг борлуулж орлого олоогүй тул зөрчил үйлдээгүй гэж үзэж, шийтгэлийн хуудсыг хүчингүй болгохыг шаардсан юм.

Талуудын байр суурь

• Нэхэмжлэгч: "Худалдах, борлуулах" гэдэг нь үйлдэгдсэн эсвэл төгссөн байх ёстой тул борлуулалт хийж орлого олсон тохиолдолд л хариуцлага хүлээлгэх ёстой, иймд зөрчил үйлдээгүй гэж үзсэн.
• Хариуцагч (захиргааны байгууллага): Согтууруулах ундааны эргэлтийн тухай хууль болон Онцгой албан татварын тухай хуульд тэмдэггүй согтууруулах ундааг худалдах, борлуулахыг хориглосон байдаг тул лангуу дээр тавьсан нь худалдах зорилготой гэж үзэх үндэслэлтэй.

Шатуудын шийдвэр

Анхан шатны шүүх нэхэмжлэлийг хэрэгсэхгүй болгосон бөгөөд давж заалдах шатны шүүх анхан шатны шийдвэрийг хэвээр үлдээв. Учир нь тухайн компани нь хуулиар хориглосон тэмдэггүй согтууруулах ундааг дэлгүүрийн лангуу дээр бусад бараатай хамт ил өрж тавьсан нь худалдах, борлуулах зорилготой гэж үзэх үндэслэлтэй тул зөрчил тогтоогдсон гэж дүгнэв.

Хууль зүйн гол дүгнэлт

• Согтууруулах ундаа худалдан борлуулах эрх бүхий этгээд тэмдэггүй согтууруулах ундааг худалдахыг хориглосон тул лангуу дээр тавьсан үйлдэл нь худалдах, борлуулах зорилготой гэж үзнэ (Согтууруулах ундааны эргэлтэд хяналт тавих, архидан согтуурахтай тэмцэх тухай хууль 21.1.3, Онцгой албан татварын тухай хууль 4.2).
• Зөрчлийн шинжийг хууль болон захиргааны хэмхэмжээний актаар тодорхойлох бөгөөд "худалдах, борлуулах" гэх үйлдэл нь барааг борлуулах зорилгоор бэлэн байлгах үйл явцыг хамарна (Зөрчлийн тухай хууль 1.2, 2.1).
• Барааг борлуулж орлого олсон эсэх нь зөрчлийг үгүйсгэх үндэслэл болохгүй, учир нь хууль нь худалдах, борлуулах үйлдлийг хориглосон тул тэр нь хэрэгжсэн тохиолдолд хариуцлага хүлээлгэнэ (Зөрчлийн тухай хууль 11.24).