ХЭРГИЙН ТАНИЛЦУУЛГА: Шүүгдэгчийг дэлгүүрийн цоожийг эвдэн, үйл ажиллагаа явуулах зориулалттай орон байранд нэвтэрч, бараа хулгайлсан гэмт хэрэгт буруутгасан. АНХАН ШАТ: Бусдын эд хөрөнгийг хүч хэрэглэхгүйгээр, нууцаар, үйл ажиллагаа явуулах зориулалттай орон байранд нэвтэрч хулгайлах гэмт хэрэг үйлдсэн гэм буруутайд тооцож, нэг жилийн хугацаагаар хорих ял оногдуулсан. ДАВЖ ЗААЛДАХ ШАТ: Гомдол гаргагч нь анхан шатны шүүх Эрүүгийн хуулийг буруу тайлбарлан хэрэглэсэн, шүүгдэгч нь гэр бүлийн эзэмшлийн эд хөрөнгийг архи ууж, согтуурсны улмаас эвдэлж хэрэглэсэн, хулгайлах санаа зорилго байгаагүй гэж маргасан. Давж заалдах шатны шүүх хэргийн бодит байдлыг тогтоож, анхан шатны шүүхийн шийтгэх тогтоол нь хэргийн бодит байдалд нийцсэн, үндэслэлтэй гэж үзэн давж заалдах гомдлыг хэрэгсэхгүй болгосон.
ҮНДЭСЛЭЛ: "Бусдын эд хөрөнгийг хулгайлах" гэдэгт бусдын эд хөрөнгийг нууц, далд аргаар, шунахай сэдэлтээр, хүч хэрэглэхгүйгээр, хууль бусаар авч, үнэ төлбөргүй өөрийн өмчийн адил захиран зарцуулах боломж бүрдүүлсэн үйлдлийг ойлгоно. "Орон байр, агуулах саванд нэвтэрч үйлдсэн" гэдгийг түлхүүр тааруулах, багаж хэрэгсэл ашиглах буюу ашиглахгүйгээр цонх, хаалга, түгжээг эвдэх, онгорхой байхад нь сэм орох зэрэг аргаар нэвтрэн орохыг ойлгоно. Хэдийгээр шүүгдэгч дэлгүүрийн хаалганы түлхүүргүй байсан ч цоожийг эвдэн нэвтэрсэн нь үйл ажиллагаа явуулах зориулалттай байранд нэвтэрсэн гэмт хэргийн шинжийг бүрэн хангасан. Гэмт хэрэг үйлдэгдсэн дэлгүүрийг түрээслэн ажиллуулдаг этгээд болон шүүгдэгч нь гэр бүлийн хамааралтай байсан нь түүнийг барааг захиран зарцуулах эрх бүхий этгээд гэж үзэх үндэслэл болохгүй. Анхан шатны шүүх хэргийн нөхцөл байдал, шүүгдэгчийн хувийн байдлыг харгалзан ял хөнгөрүүлэх үндэслэл байвал хэрэглэх боломжтой бөгөөд оногдуулсан ял нь хуульд нийцсэн.