Тогтоол №2961

ХЭРГИЙН ТАНИЛЦУУЛГА: Яллагдагч нь урьд олон удаа ижил төрлийн хулгайн гэмт хэрэгт шийтгүүлж байсан, ялтай үедээ иргэнээс гар утас хулгайлж, бага бус хэмжээний хохирол учруулсан хэрэгт холбогджээ. Прокурор түүний үйлдлийг Эрүүгийн хуулийн 145 дугаар зүйлийн 145.2 дахь хэсэгт зааснаар зүйлчилсэн.

АНХАН ШАТ: Баянзүрх дүүргийн Эрүүгийн хэргийн анхан шатны шүүх нь Эрүүгийн байцаан шийтгэх хуулийн 208 дугаар зүйлийн 208.1.2 дахь хэсэгт заасныг үндэслэн яллагдагчийг цагаатгаж, хэргийг хэрэгсэхгүй болгосон.

ДАВЖ ЗААЛДАХ ШАТ: Прокурор анхан шатны шүүхийн цагаатгах тогтоолыг эс зөвшөөрч эсэргүүцэл бичсэн. Үүнд, яллагдагчийн мөрдөн байцаалтын үед өгсөн гэм буруугаа хүлээн зөвшөөрсөн мэдүүлэг, хохирол барагдуулсан байдал, гүйцэтгэх ажлын шугамаар илрүүлсэн баримт, мөн түүний урьдын олон удаагийн ижил төстэй гэмт хэргийн ялтай байдлыг шүүх үнэлээгүй нь хууль бус. Шүүхийн тогтоол нь Эрүүгийн байцаан шийтгэх хуулийн 284 дүгээр зүйлийн шаардлагыг хангаагүй гэж үзсэн. Цагаатгагдсан этгээдийн өмгөөлөгч нь анхан шатны шүүхийн шийдвэрийг хууль зүйн үндэслэлтэй, нотлох баримт хангалтгүй байсан тул зөв гэж үзэж, прокурорын эсэргүүцлийг хэрэгсэхгүй болгохыг хүссэн. Тэрээр яллагдагчийн мэдүүлэг болон хохирол төлсөн байдлыг нотлох баримтаар үзэх нь өөрийгөө буруутгахгүй байх эрхийг зөрчинө, гүйцэтгэх ажиллагааны баримтууд хэрэгт байхгүй, камерын бичлэг тодорхойгүй байгааг онцолжээ.

ҮНДЭСЛЭЛ: Анхан шатны шүүхийн цагаатгах тогтоол нь Эрүүгийн байцаан шийтгэх хуулийн 284 дүгээр зүйлийн 284.1 дэх хэсэгт заасан хууль ёсны болон үндэслэлтэй байх шаардлагыг хангаагүй. Мөрдөн байцаалтын үед яллагдагчийг төлбөрийн чадваргүй, бичиг үсэг мэддэггүй байхад нь өмгөөлүүлэх эрхээр хангаагүй нь Эрүүгийн байцаан шийтгэх хуулийн 40 дүгээр зүйлийн 40.2 дахь хэсгийг ноцтой зөрчсөн. Мөн Эрүүгийн байцаан шийтгэх хуулийн 13 дугаар зүйлийн 13.2, 208 дугаар зүйлийн 208.1.2 дахь хэсгүүдэд заасанчлан хэргийг хэрэгсэхгүй болгох, эргэлзээг яллагдагчид ашигтайгаар шийдвэрлэхэд бүхий л нотлох баримтыг шалгасан, нэмэлт ажиллагааг хийсэн байх нөхцөл хангагдаагүй байна. Тухайлбал, камерын бичлэгийг эд мөрийн баримтаар тооцож, үзлэг хийж бэхжүүлэх, бичлэгт байгаа хүнийг тогтоох, гүйцэтгэх ажиллагааны баримтуудыг хэрэгт авагдаж, хууль ёсны эсэхийг тодруулах зэрэг мөрдөн байцаалтын ажиллагааг хангалтгүй хийсэн. Иймд цагаатгах тогтоолыг хүчингүй болгож, хэргийг нэмэлт мөрдөн байцаалтад буцаахаар шийдвэрлэсэн. Улсын яллагчийн хэргийг анхан шатны шүүхээр дахин хэлэлцүүлэх тухай эсэргүүцлийн хэсгийг хууль зүйн үндэслэлгүй гэж үзэн хэрэгсэхгүй болгов.