Тогтоол №7860

ХЭРГИЙН ТАНИЛЦУУЛГА: "ТОСК" ТӨХХК-ийн Үйлдвэрчний эвлэлийн хороо нь Төрийн өмчийн бодлого зохицуулалтын газрын "Төрийн орон сууцны корпораци төрийн өмчит хязгаарлагдмал хариуцлагатай компанийн Төлөөлөн удирдах зөвлөлд төрийн өмчийн төлөөлөл хэрэгжүүлэх гишүүдийг томилох тухай" 203 дугаар тогтоолыг илт хууль бус болохыг тогтоолгох, хараат бус гишүүд томилоогүй нь хууль бус эс үйлдэл болохыг тогтоолгохоор нэхэмжилсэн. АНХАН ШАТ: Шүүхээс нэхэмжлэлийн шаардлагыг бүхэлд нь хэрэгсэхгүй болгосон.

ҮНДЭСЛЭЛ: Нэхэмжлэгч нь Компанийн тухай хуулийн 75.4-д заасны дагуу Төлөөн удирдах зөвлөл нь 9 гишүүнтэй байх, тэдгээрийн 1/3 нь хараат бус байх ёстой байтал 7 гишүүнтэй ТУЗ томилсон, хараат бус гишүүд оруулаагүй нь хууль бус гэж үзсэн. Хариуцагч нь Компанийн тухай хуулийн 75.3-д заасны дагуу компанийн дүрмээр ТУЗ-ын гишүүдийн тоог тогтоох бөгөөд "ТОСК" ТӨХХК-ийн дүрэмд ТУЗ-ыг 7 гишүүнтэй байхаар заасны дагуу болон холбогдох журмыг үндэслэн гишүүдийг томилсон, 75.4-д заасныг хязгаарлагдмал хариуцлагатай компанид заавал дагах албагүй, компанийн дүрэмд хараат бус гишүүнтэй байх гэж заагаагүй тул тогтоол нь хууль бус гэж үзэх үндэслэлгүй гэж тайлбарласан. Шүүхээс хариуцагчийн үйлдлийг Захиргааны ерөнхий хуулийн 47.1.5-д заасан хууль бус үйлдэл, эс үйлдэхүйг гүйцэтгэхийг шаардсан гэх нөхцөл тогтоогдоогүй, компани болон түүний дүрмийг үндэслэн гишүүд томилсон нь хууль зөрчөөгүй, нэхэмжлэгчийн эрх ашиг зөрчигдөөгүй гэж үзсэн.