Тогтоол №7615

ХЭРГИЙН ТАНИЛЦУУЛГА: З ХХК нь хайгуулын тусгай зөвшөөрлийн хугацааг нөхөн сэргээх хүсэлтийг нь хангаагүй шийдвэрийг хууль бус болохыг тогтоолгон, түдгэлзүүлсэн хугацаагаар тусгай зөвшөөрлийг сэргээхийг хариуцагчид даалгахыг шаарджээ. Нэхэмжлэгчийн үзэж буйгаар, гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох хуулийн дагуу үйл ажиллагаа нь зогссон бөгөөд дараа нь стратегийн ач холбогдолтой ордын хил заагт хамрагдсан нь үйл ажиллагаа явуулах боломжгүй болсон шалтгаан болсон тул тусгай зөвшөөрлийн хугацааг сэргээх ёстой. Түүнчлэн, Аж ахуйн үйл ажиллагааны тусгай зөвшөөрлийн тухай хууль болон Захиргааны ерөнхий хуулийн зарчмуудыг үндэслэн шийдвэр гаргах ёстой гэжээ. Хариуцагчийн үзэж буйгаар, нэхэмжлэгчийн хайгуулын тусгай зөвшөөрөл аль хэдийн 3 удаа 3 жилийн хугацаагаар буюу нийт 12 жил сунгагдсан тул цаашид сунгах, нөхөн тооцох хууль зүйн үндэслэл байхгүй. Мөн тусгай зөвшөөрлийг зохицуулсан Ашигт малтмалын тухай хуульд түдгэлзүүлэх, сэргээхтэй холбоотой зохицуулалт байхгүй, түүнчлэн эрх бүхий байгууллагаас тусгай зөвшөөрлийг түдгэлзүүлсэн шийдвэр гараагүй тул нэхэмжлэлийн шаардлага хууль зүйн үндэслэлгүй байна.

АНХАН ШАТ: Ашигт малтмалын тухай хуулийн 11 дүгээр зүйлийн 11.2, 21 дүгээр зүйлийн 21.1.5 дахь заалтуудыг баримтлан, нэхэмжлэгч З ХХК-ийн хайгуулын тусгай зөвшөөрлийн хугацааг нөхөн тооцож сэргээх хүсэлтээс татгалзсан хариуцагчийн шийдвэрийг хууль бус болохыг тогтоон, түдгэлзүүлсэн хугацаагаар нь сэргээхийг даалгах тухай нэхэмжлэлийн шаардлагыг бүхэлд нь хэрэгсэхгүй болгосон.

ҮНДЭСЛЭЛ: Нэхэмжлэгчийн хайгуулын тусгай зөвшөөрлийг нийт 12 жилийн хугацаагаар сунгасан тул цаашид дахин сунгах, нөхөн тооцож сэргээх хууль зүйн үндэслэл, боломж байхгүй. Ашигт малтмалын тухай хуулиар тусгай зөвшөөрлийн хугацаатай холбоотой асуудлыг нарийвчилсан зохицуулалттай байдаг тул Аж ахуйн үйл ажиллагааны тусгай зөвшөөрлийн тухай хуулийг хэрэглэх боломжгүй. Ашигт малтмалын тухай хуульд хайгуулын тусгай зөвшөөрлийг түдгэлзүүлэх, түдгэлзүүлсэн хугацаагаар нөхөн тооцохтэй холбоотой зохицуулалт, эрх хэмжээ байхгүй тул хариуцагчийн шийдвэр хууль ёсны байна.