ХЭРГИЙН ТАНИЛЦУУЛГА: Нэхэмжлэгч нь захиргааны байгууллагаас засаг даргад нэр дэвшүүлэхгүй байгаа нь хууль бус болохыг тогтоолгож, нэр дэвшүүлэх тогтоол гаргахыг даалгах шаардлага бүхий нэхэмжлэл гаргасан. АНХАН ШАТ: Хариуцагч нь нэхэмжлэлийн шаардлагыг бүхэлд нь хүлээн зөвшөөрсөн бөгөөд энэ нь бусдын эрх, хууль ёсны ашиг сонирхлыг хөндөөгүй, хуульд харшлаагүй гэж үзэж, Захиргааны хэрэг шүүхэд хянан шийдвэрлэх тухай хуулийн 67.1-д заасны дагуу хариуцагчийн зөвшөөрлийг баталж, хэргийг хэрэгсэхгүй болгосон.
ҮНДЭСЛЭЛ: Захиргааны хэрэг шүүхэд хянан шийдвэрлэх тухай хуулийн 67.1-д хариуцагч нэхэмжлэлийн шаардлагыг бүхэлд нь хүлээн зөвшөөрвөл, бусдын эрх, эрх чөлөө, хууль ёсны ашиг сонирхлыг хөндөөгүй, хуульд харшлаагүй тохиолдолд шүүх хариуцагчийн зөвшөөрлийг баталж, хэргийг хэрэгсэхгүй болгоно гэж заасан.