ХЭРГИЙН ТАНИЛЦУУЛГА: Гэр бүл салсны дараах хамтран өмчлөх эд хөрөнгөө хуваах тухай маргаан. АНХАН ШАТ: Гэрлэлтээ цуцлуулсан хосуудын хамтран өмчлөх орон сууц, мал хөрөнгийн үнэлгээнээс хүүхдүүдэд ногдох хэсгийг гаргуулах шаардлага болон орон сууцыг худалдан авсан гуравдагч этгээдийн эзэмших эрхээ хамгаалах шаардлагыг шийдвэрлэв. ДАВЖ ЗААЛДАХ ШАТ: Хариуцагч болон түүний өмгөөлөгч нар анхан шатны шүүхийн шийдвэрийг хууль зүйн үндэслэлгүй, хэт нэг талыг барьсан гэж үзэн эсэргүүцэв.
ҮНДЭСЛЭЛ: Гэрлэлтийн үед хамтран бий болгосон эд хөрөнгө нь гэр бүлийн хамтран өмчлөх дундын өмчид хамаарна. Гэрлэгчид гэрлэлтээ цуцлах үедээ эд хөрөнгийн талаар маргаангүй гэсэн байр суурьтай байсан ч, хожим нь хөрөнгөө хуваах боломжтой. Гэр бүлийн гишүүдийн хуваарьт хөрөнгөөс бусад хамтран амьдрах хугацаанд бий болсон хөрөнгө нь гэр бүлийн хамтран өмчлөх дундын өмч болдог. Орон сууцны зээлийг цалингаараа төлсөн нь тухайн орон сууцыг хувиарт хөрөнгө болгох үндэслэл болохгүй. Шүүх нь нотлох баримтыг тал бүрээс нь эргэлзээгүй үнэн зөв талаас нь үнэлж, хэргийг шийдвэрлэх ёстой.