Тогтоол №24965

ХЭРГИЙН ТАНИЛЦУУЛГА: Компани нь ажилтныхаа үр бүтээлтэй ажилласныг үнэлж орон сууц бэлэглэхээр амласан боловч ажилтан нь компанитай өрсөлдөхүйц бизнес эрхэлж, компанид хохирол учруулсан тул амлалтаа цуцлах, орон сууцны өмчлөх эрхийг компанид буцаан шилжүүлэхийг нэхэмжилжээ. Хариуцагч нь тухайн орон сууцыг өмчлөх эрхээ баталгаажуулах, компани болон гуравдагч этгээдийн хоорондох орон сууц худалдах, худалдан авах гэрээг хүчингүй болгуулах, өмчлөх эрхийг өөртөө шилжүүлэхийг шаардсан. Гуравдагч этгээд нь орон сууцыг компаниас худалдан авч, үнэнд нь бараа нийлүүлсэн тул өмчлөх эрхийг өөртөө тогтоолгож, хариуцагчийг хууль бус эзэмшлээс албадан гаргахыг шаарджээ. АНХАН ШАТ: Компанийн нэхэмжлэлийг хэрэгсэхгүй болгож, хариуцагчийн сөрөг нэхэмжлэлийн шаардлагыг хангаж, орон сууцны өмчлөх эрхийг хариуцагчийн нэр дээр бүртгүүлэхийг даалгажээ. Гуравдагч этгээдийн бие даасан шаардлагыг хэрэгсэхгүй болгосон. ДАВЖ ЗААЛДАХ ШАТ: Анхан шатны шүүхийн шийдвэрийг компанийн зүгээс эс зөвшөөрч, компани нь амлалт өгөхдөө болзолтой байсан, үл хөдлөх хөрөнгийн өмчлөх эрх бүртгэл хийгдсэний дараа шилждэг, хариуцагч нь үлдэгдэл төлбөрийг хийхээр тохиролцсон, гэр бүлийн нөхцөл байдлыг харгалзан үнэ төлбөргүйгээр амьдруулсан, бусад ажилтнууд болзол хангагдаагүй тул байраа буцаан өгсөн зэрэг үндэслэлээр давж заалджээ. Хариуцагч нь анхан шатны шүүхийн шийдвэрийг дэмжиж, компанийн гомдлыг хэрэгсэхгүй болгуулахыг хүссэн. ҮНДЭСЛЭЛ: Давж заалдах шатны шүүхээс компанийн нэхэмжлэлийг хуулийн үндэслэлгүй гэж үзэж хэрэгсэхгүй болгосон бөгөөд амлалт нь цалин хөлсний бүрдэл хэсэг болох шагнал урамшуулал хамаарна гэж дүгнэжээ. Хариуцагчийн сөрөг нэхэмжлэлийг компани нь улсын бүртгэлд гэрчилгээг өөрийн нэр дээр бүртгүүлж, улмаар гуравдагч этгээд рүү шилжүүлсэн, гуравдагч этгээд нь орон сууцыг эзэмшиж байсныг мэдсээр байж худалдан авсан тул өмчлөх эрхийг хариуцагчийн нэр дээр тогтоох боломжгүй гэж үзэн, анхан шатны шийдвэрт өөрчлөлт оруулж, сөрөг нэхэмжлэлийг хэрэгсэхгүй болгожээ. Гуравдагч этгээдийн шаардлага нь хариуцагчийн эзэмшил хууль бус байх нөхцөлөөс хамаарна, гэтэл хариуцагчийн эзэмшил хууль бус гэж үзэхгүй тул түүний шаардлагыг хэрэгсэхгүй болгосон. Эцэст нь, компанийн давж заалдах гомдлыг хангахгүй орхиж, анхан шатны шүүхийн шийдвэрийн тогтоох хэсгийг өөрчлөн найруулж, гуравдагч этгээдийн бие даасан шаардлагыг хэрэгсэхгүй болгосон хэсгийг хэвээр үлдээсэн.