ХЭРГИЙН ТАНИЛЦУУЛГА: Н.М нь Эрдэнэ сумын засаг даргаар ажиллаж байхдаа газрыг хууль бусаар олгосон, байгаль орчны хуулийг зөрчсөн, ашигт малтмалын хуулийг зөрчин чулуу олборлох зөвшөөрөл олгож, албан тушаалаа урвуулан ашигласан хэрэгт холбогджээ.
АНХАН ШАТ: Н.М-г Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар албан тушаалаа урвуулан ашиглаж бусдад давуу байдал бий болгосон гэм буруутайд тооцож, нийтийн албанд томилогдох эрхийг 3 жил хасаж, 7 сая төгрөгөөр торгох ялаар шийтгэсэн. Иргэний хариуцагч компаниудаас хохирлыг гаргуулж байгаль орчин, уур амьсгалын санд төвлөрүүлэхээр шийдвэрлэсэн.
ДАВЖ ЗААЛДАХ ШАТ: Шүүгдэгч болон түүний өмгөөлөгч нар анхан шатны шүүхийн шийтгэх тогтоол нь үндэслэлгүй, алдаатай шийдвэрээ залруулсан, бусдад давуу байдал бий болгоогүй гэж гомдол гаргасан. Гэвч шүүх гэм бурууг нотлох баримтыг бүрэн шалгаж тогтоогоогүй, мөрдөн шалгах ажиллагаа хангалтгүй хийгдсэн гэж үзэн анхан шатны шүүхийн шийтгэх тогтоолыг хүчингүй болгож, хэргийг прокурорт буцаахаар шийдвэрлэсэн.