ХЭРГИЙН ТАНИЛЦУУЛГА: Гэр бүлийн хүчирхийллийн улмаас эхнэрээ алсан, охиндоо хөнгөн гэмтэл учруулсан хэрэгт холбогдох иргэн Ж.Ч-ийн эсрэг анхан шатны шүүхээс ял оноосон. АНХАН ШАТ: Ж.Ч-ийг хүнийг онц харгис хэрцгийгээр, гэр бүлийн хүчирхийлэл үйлдэж алсан, мөн гэр бүлийн хүчирхийлэл үйлдэж бага насны хүүхэд гэдгийг мэдсээр байж эрүүл мэндэд нь хөнгөн хохирол учруулсан гэм буруутайд тооцож, 15 жил хорих ял, 500,000 төгрөгөөр торгох ял оноосон. ДАВЖ ЗААЛДАХ ШАТ: Шүүгдэгчийн өмгөөлөгчид анхан шатны шүүхийн шийдвэрт эрүүгийн хариуцлага хүлээлгэх, ялын төрөл, хэмжээг тогтоохдоо хуулийн заалтыг үндэслэлгүй хэрэглэсэн, ялуудыг тус тусад нь эдлүүлэх үндэслэл тодорхойгүй, нотлох баримтууд хангалтгүй зэрэг зөрчлүүд байгааг дурдаж, хэргийг анхан шатны шүүхээр дахин хэлэлцүүлэхээр болсон.
ҮНДЭСЛЭЛ: Анхан шатны шүүх нь Эрүүгийн хуулийн тусгай ангид заасан хүнд гэмт хэрэгт холбогдох хэргийг хянан шийдвэрлэхдээ Эрүүгийн хэрэг хянан шийдвэрлэх тухай хуулийн шаардлагыг хангаагүй, шүүхийн шийдвэрийн тодорхойлох хэсэгт эрүүгийн хариуцлагын төрөл, хэмжээний үндэслэл, ялуудыг тус тусад нь эдлүүлэх болсон шалтгаан, дүгнэлтийг дутуу хийсэн нь Эрүүгийн хуулийг буруу хэрэглэсэн, ноцтой зөрчил болсон тул шийтгэх тогтоолыг хүчингүй болгож, хэргийг дахин хэлэлцүүлэхээр шийдвэрлэсэн.