ХЭРГИЙН ТАНИЛЦУУЛГА: Мансууруулах болон сэтгэцэд нөлөөт бодисыг хууль бусаар олж авсан, хадгалсан, худалдаалсан гэмт хэрэгт холбогдсон этгээдүүдийн хэргийг давж заалдах шатны шүүхэд хянан хэлэлцсэн. АНХАН ШАТ: Мансууруулах болон сэтгэцэд нөлөөт бодисыг худалдаалах зорилгоор хууль бусаар олж авсан, хадгалсан, худалдсан үйлдлийг нь Эрүүгийн хуулийн тусгай ангийн 20.7 дугаар зүйлийн 2 дахь хэсэгт зааснаар тогтоож, нэг этгээдийг 2 жил 8 сараар, мансууруулах болон сэтгэцэд нөлөөт бодисыг худалдаалах зорилгогүйгээр хадгалсан үйлдлийг Эрүүгийн хуулийн тусгай ангийн 20.7 дугаар зүйлийн 1 дэх хэсэгт зааснаар тогтоож, нөгөө этгээдийг 1 жил хорих ялаар шийтгэсэн. ДАВЖ ЗААЛДАХ ШАТ: Анхан шатны шүүхийн шийдвэрийг эс зөвшөөрч, хэргийн зүйлчлэлийг өөрчлөх, хэргийг мөрдөн байцаалтанд буцаах, ялыг тэнсэж өгөх зэрэг үндэслэлээр давж заалдах гомдол гаргасан. ҮНДЭСЛЭЛ: Шүүгдэгч нар болон тэдний өмгөөлөгчдөөс гаргасан давж заалдах гомдлууд нь үндэслэлгүй бөгөөд анхан шатны шүүх хэргийн бодит байдлыг зөрчилгүй тогтоож, хуулийг зөв хэрэглэсэн тул шийтгэх тогтоолыг хэвээр үлдээсэн.