ХЭРГИЙН ТАНИЛЦУУЛГА: Хоёр хүн бүлэглэн дээрэм хийж, хохирогчийн биед хөнгөн хохирол учруулсан гэмт хэрэгт холбогдсон. АНХАН ШАТ: Анхан шатны шүүхээс хоёр этгээдийг бүлэглэн дээрэм хийсэн, хүний эрүүл мэндэд хөнгөн хохирол учруулсан гэмт хэрэгт буруутгаж, тус бүрд нь 1 жил 1 сарын хорих ял оногдуулсан. Гэвч нэг төрлийн гэмт хэргийг хөөн хэлэлцэх хугацаа дууссан гэж үзэн хэрэгсэхгүй болгож, эрүүгийн хариуцлагаас чөлөөлсөн. ДАВЖ ЗААЛДАХ ШАТ: Шүүгдэгч давж заалдах гомдол гаргасан. Давж заалдах шатны шүүхээс анхан шатны шүүхээс үйлдсэн хөөн хэлэлцэх хугацааг буруу тооцсон, мөн хүндрүүлэх нөхцөлтэй гэмт хэргийг хөнгөвчилж хэрэгсэхгүй болгосон нь хууль зүйн үндэслэлгүй гэж үзсэн. Мөн шүүгдэгчийн эрх зүйн байдлыг хүндрүүлэх болон анхан шатны шүүхээс хэрэгсэхгүй болгосон хэргийн зүйлчлэлээр ял оногдуулах эрх давж заалдах шатны шүүхэд байхгүй гэж үзэн анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр буцаасан.
ҮНДЭСЛЭЛ: Шүүгдэгч оргон зайлсан тохиолдолд хөөн хэлэлцэх хугацааг зогсоон, баригдсан эсхүл өөрөө илчилсэн өдрөөс сэргээж тоолох хуулийн заалтыг анхан шатны шүүх буруу хэрэглэсэн. Давж заалдах шатны шүүхэд шүүгдэгчийн эрх зүйн байдлыг хүндрүүлэх эрх байхгүй.