Тогтоол №3264

ХЭРГИЙН ТАНИЛЦУУЛГА: Ялтан согтууруулах ундаа хэрэглэсэн үедээ караокены өрөөнд амь хохирогчийг үл ялих зүйлээр шалтаглан хүзүүгээр нь боож санаатай алсан хэрэг. Прокурор уг үйлдлийг Эрүүгийн хуулийн тусгай ангийн 91.2.2 (танхайн сэдэлтээр), 91.2.15 (биеэ хамгаалах чадваргүйг мэдсээр байж) зүйл заалтаар яллах дүгнэлт үйлдсэн. АНХАН ШАТ: Анхан шатны шүүх прокурорын 91.2.15-д зааснаар зүйлчилснийг хэргийн бүрэлдэхүүнгүй гэж Эрүүгийн байцаан шийтгэх хуулийн 24.1.1-д зааснаар хэрэгсэхгүй болгосон. Ялтныг танхайн сэдэлтээр хүнийг санаатай алсан гэм буруутайд тооцож, Эрүүгийн хуулийн тусгай ангийн 91.2.2-т зааснаар 16 жилийн хорих ял оногдуулсан. Иргэний хуулийн 497.1, 508.1 дэх хэсэгт зааснаар гэм хорын хохиролд 6,761,410 төгрөг гаргуулахаар шийдвэрлэсэн. ДАВЖ ЗААЛДАХ ШАТ: Хохирогчийн хууль ёсны төлөөлөгч нь 91.2.15 зүйлчлэлийг хэрэгсэхгүй болгосон болон гэм хорын нэхэмжлэлийг бүрэн хангаагүй, ял хөнгөдсөн гэж гомдол гаргасан. Ялтан болон түүний өмгөөлөгчид үйлдлийг танхайн сэдэлттэй гэж үзсэн нь үндэслэлгүй, санаатай алсан бус, болгоомжгүй үйлдлээр амь хохироосон гэж үзэж, зүйлчлэлийг Эрүүгийн хуулийн 91.1 эсхүл 94.1 болгон өөрчилж, ялыг хөнгөрүүлэхийг хүссэн. Прокурор анхан шатны шүүхийн шийтгэх тогтоолыг хэвээр үлдээх саналтай байсан. ҮНДЭСЛЭЛ: Давж заалдах шатны шүүх хэргийн материал, нотлох баримтуудыг хянаад, амь хохирогч хүнд зэргийн согтолттой байсан ч идэвхтэй үйлдэл хөдөлгөөн хийж байсан тул биеэ хамгаалах чадваргүй болсон гэж үзэх үндэслэлгүй байна гэж дүгнэсэн. Иймд анхан шатны шүүх прокурорын 91.2.15-д зааснаар зүйлчилснийг хэрэгсэхгүй болгосон нь Эрүүгийн байцаан шийтгэх хуулийн 13.2-т заасан “эргэлзээг шүүгдэгчид ашигтайгаар шийдвэрлэх” зарчимд нийцсэн гэж үзсэн. Ялтан Ц.Дэлгэрмандалыг “согтуурхаж бусадтайгаа муудалцаж, караокены өрөөнөөс гарах гэлээ” гэх үл ялих зүйлээр шалтаглан хүзүүг нь боож амьсгал бүтэлтээр нас барахад хүргэсэн үйлдэл нь олон нийтийн үйлчилгээний газар үйлдэгдсэн тул танхайн сэдэлтээр хүнийг санаатай алсан гэж үзэх 91.2.2-ын зүйлчлэл хууль зүйн үндэслэлтэй байна гэж дүгнэсэн. Анхан шатны шүүх хуулийг зөв хэрэглэж, ялтан М.Цэнгүүнбилэгт хуульд заасан ял шийтгэлийг оногдуулсан, гэм хорыг төлүүлэхээр шийдвэрлэсэн нь хууль ёсны бөгөөд үндэслэлтэй байна. Иймд давж заалдах гомдлуудыг бүхэлд нь хэрэгсэхгүй болгож, анхан шатны шүүхийн шийтгэх тогтоолыг хэвээр үлдээсэн.