Тогтоол №3248

ХЭРГИЙН ТАНИЛЦУУЛГА: 2015 оны 11 дүгээр сарын 10-нд “Тамир Ерөө” хүнсний дэлгүүрийн гадна Д.Түдэв нь согтуугаар танхайн сэдэлтээр Д.Энхтайваныг толгойгоор мөргөж санаатай алсан, Д.Галбадрах согтуугаар танхайрсан, Н.Эрдэнэбаяр, С.Энхтайван, Н.Хашчулуун нар бүлэглэн танхайрч Д.Галбадрах, Д.Түдэв нарт гэмтэл учруулсан, З.Энхтуяа нь хуурамч мэдүүлэг өгсөн гэх хэрэгт прокуророос яллах дүгнэлт үйлдэж шүүхэд шилжүүлжээ.

АНХАН ШАТ: Сэлэнгэ аймгийн сум дундын Эрүүгийн хэргийн анхан шатны шүүх 2017 оны 01 дүгээр сарын 25-ны өдрийн тогтоолоор хэргийг Эрүүгийн байцаан шийтгэх хуулийн 230.1.2, 230.1.3-т заасныг үндэслэн нэмэлт мөрдөн байцаалтад буцааж шийдвэрлэсэн.

ДАВЖ ЗААЛДАХ ШАТ: Улсын яллагч анхан шатны шүүхийн тогтоол хууль зүйн үндэслэлгүй гэж эсэргүүцэл бичсэн. Эсэргүүцэлд талийгаачийн урьд авсан гэмтэл, цусан хурааг тогтоох, маршрутыг тогтоох, мөн шүүх туршилт хийлгэх, мэдүүлгийн зөрүүг арилгах зэрэг нь үндэслэлгүй, шалгах шаардлагагүй гэж үзсэн. Шүүгдэгч, өмгөөлөгч нар мөрдөн байцаалт нэг талыг барьсан, хууль зөрчсөн, мэдүүлгийн зөрүүг арилгаагүй тул анхан шатны шүүхийн тогтоолыг хэвээр үлдээх нь зүйтэй гэж тайлбарласан. Давж заалдах шатны шүүх анхан шатны шүүхийн тогтоолыг хэвээр үлдээж, улсын яллагчийн эсэргүүцлийг хэрэгсэхгүй болгосон.

ҮНДЭСЛЭЛ: Давж заалдах шатны шүүх анхан шатны шүүхийн тогтоолыг хууль ёсны бөгөөд үндэслэл бүхий гэж үзэв. Хэрэг бүртгэлт, мөрдөн байцаалтын ажиллагааг бүрэн биш хийсэн, шүүх хуралдаанаар нөхөн гүйцэтгэх боломжгүй байсан тул нэмэлт мөрдөн байцаалт зайлшгүй шаардлагатай. Тухайлбал, гэрчүүдийн садан төрлийн холбоог тогтоож, ЭБШХ 46.7-д заасан журмын дагуу байцаалт авах, яллагдагчдын ямар үйлдлээс Д.Түдэвт хүндэвтэр, Д.Галбадрахад хөнгөн гэмтэл учирсан, танхайрсан хэрэгт өөр этгээд оролцсон эсэхийг тодруулах, хохирогч, шүүгдэгч нарын хоорондох үйлдэл болон мөргөлдөөний талаарх гэрчүүдийн зөрүүтэй мэдүүлгийг арилгах, гэрчүүдийн харах боломжийг туршилтын тэмдэглэлд тулгуурлан нарийвчлан тогтоох шаардлагатай. Мөн С.Энхтайван, Н.Хашчулуун нарт хүндэвтэр гэмтэл учруулсан шинжээчийн дүгнэлтийг албан ёсоор танилцуулалгүй, байцаалт авалгүйгээр яллах дүгнэлт үйлдсэн нь яллагдагч нарын эрх зүйн байдлыг дордуулсан байна. Хохирогчийг газар унасан байхад Д.Галбадрах өшиглөж байсан үйлдлийг мөрдөн байцаалт дүгнэлгүй орхигдуулсан зэрэг нь мөрдөн байцаах ажиллагааны зөрчлүүд юм. Харин талийгаачийн урьд авсан гэмтлийн шалтгааныг тодруулах, Наранцэцэгийг гэрчээр дахин байцаах нь шаардлагагүй гэж үзсэн. Иймд Эрүүгийн байцаан шийтгэх хуулийн 80 дугаар зүйлд заасан гэмт хэрэг гарсан байдлыг нарийвчлан тогтоох зорилгоор анхан шатны шүүхийн тогтоолыг хэвээр үлдээж, прокурорын эсэргүүцлийг хэрэгсэхгүй болгосон.