ХЭРГИЙН ТАНИЛЦУУЛГА: Хууль бусаар мод бэлтгэж, улсын санд хохирол учруулсан, мөн гарал үүслийн гэрчилгээгүй мод тээвэрлэсэн этгээдүүдийн хэргийг хянан хэлэлцэв. АНХАН ШАТ: Хууль бусаар мод бэлтгэсэн болон тээвэрлэсэн этгээдүүдийг Эрүүгийн хуулийн тусгай ангийн 24.6 дугаар зүйлийн 1 дэх хэсэгт зааснаар тус бүр 450 нэгжээр торгох ял оногдуулж, учруулсан хохирлыг гаргуулан, гэмт хэрэг үйлдэхэд ашигласан тээврийн хэрэгслийн үнийг улсын орлогод оруулахаар шийдвэрлэсэн. ДАВЖ ЗААЛДАХ ШАТ: Шүүгдэгч нарын өмгөөлөгч тээврийн хэрэгслийн үнийг гаргуулахаар шийдвэрлэсэн нь буруу бөгөөд Эрүүгийн хуулийг буруу тайлбарлаж хэрэглэсэн хэмээн гомдол гаргав. ҮНДЭСЛЭЛ: Гэмт хэрэг үйлдэхэд ашигласан, бусдын өмчлөлийн тээврийн хэрэгслийн үнийг Эрүүгийн хуулийн 7.5 дугаар зүйлийн 2 дахь хэсэгт заасан журмын дагуу улсын орлогод оруулах нь зөв бөгөөд хууль, зарчимд нийцсэн байх тул давж заалдах гомдлыг хэрэгсэхгүй болгож, анхан шатны шүүхийн шийдвэрийг хэвээр үлдээв.