ХЭРГИЙН ТАНИЛЦУУЛГА: Хоёр этгээд нь хууль бусаар ховор ургамлын жагсаалтад орсон хуш модны самар түүж, тээвэрлэсний улмаас байгаль экологид учирсан хохирлыг нөхөн төлүүлэхтэй холбоотой хэрэг. АНХАН ШАТ: Гэмт хэрэг үйлдсэн этгээдүүдийг Эрүүгийн хуулийн тусгай ангийн 24.8 дугаар зүйлийн 1 дэх хэсэгт заасан "Зохих зөвшөөрөлгүйгээр, хуульд зааснаас өөр зорилгоор ховор ургамлын үрийг түүсэн, тээвэрлэсэн" гэмт хэргийг бүлэглэн үйлдсэн гэм буруутайд тооцож, тус бүрд нь 1 жил 2 сарын хугацаагаар зорчих эрхийг хязгаарлах ял оногдуулж, байгаль экологид учруулсан 24,329,400 төгрөгийн хохирлыг хувь тэнцүүлэн гаргуулахаар шийдвэрлэсэн.
ҮНДЭСЛЭЛ: Хуш модны самар нь ховор ургамалд хамаарах бөгөөд түүнийг түүх, бэлтгэх, тээвэрлэх нь Эрүүгийн хуулиар хориглосон үйлдэл болох нь нотлох баримтуудаар тогтоогдсон. Ургамлын аймагт учруулсан хохирлыг тогтоохдоо экологи-эдийн засгийн үнэлгээг тав дахин нэмэгдүүлэн тооцсон. Гэмт хэргийг үйлдсэн нөхцөл байдал, учирсан хохирлын хэмжээ, этгээдүүдийн хувийн байдал, гэм буруугаа хүлээн зөвшөөрснийг харгалзан ял оногдуулсан.